रामकृष्ण चालले....

नश्वर देहा टाकुनि मागे
रामकृष्ण चालले! रामकृष्ण चालले!ध्रु.

व्यक्ताव्यक्ती ईश्वर भरला
स्थलकालाच्या अतीत उरला-
मर्त्य शरीरे हे अनुभवले.....१

कामिनिकांचन मोह त्यागिला
अहंभाव तो पूर्ण नाशिला
वाण सतीचे करी घेतले.....२

चारित्र्याचे कमळ फुलावे
आत्मौपम्ये विश्व पहावे
आचरणाने असे बोधिले.....३

धर्माची जगि एकवाक्यता
ऐसा अनुभव आला चित्ता
धर्माचे एकत्व वर्णिले.....४

रचयिता : श्रीराम बाळकृष्ण आठवले