गीतमुकुन्द - गाठणे सन्मित्राचे धाम

शिरी टोपली, मुखी श्रीहरी
वदनी मंगल नाम
गाठणे सन्मित्राचे धाम!ध्रु.

प्रहरी निद्रित दिसता सगळे
साहस चित्ती गोड हासले
अमोल ठेवा जपुन न्यायचा
हेच अलौकिक काम!१

दुथडी भरुनी वाहे यमुना
थांग तिचा कोणास कळेना
लव न थांबता पुढे चालणे
ठाउक ना विश्राम!२

यमुने का गे अशी खवळसी
दृढ निर्धारा भीति दाविसी
हृदयी दाटले साहस गाते
मुनिवर घोषित साम!३

इकडे पाणी तिकडे पाणी
रुद्ध ना परी माझी वाणी
अंतरातला भाव सांगतो
संरक्षक श्रीराम!४

टोपलीतले बालक इवले
मुखी आंगठा चोखत पडले
पादस्पर्शे यमुना शमली
खुद्कन् हसला श्याम!५

सर्वेश्वर तर पाठीराखा
पार लावतो श्रद्धा नौका
दिसले गोकुळ कंठ दाटला
पूरित मंगलकाम!६
गाठले सन्मित्राचे धाम

गीतमुकुन्द
रचयिता : श्रीराम बाळकृष्ण आठवले