जा सुखेनैव जा वीरा..

जा सुखेनैव जा वीरा
मरणास स्वये सामोरा!ध्रु.

स्वातंत्र्ययज्ञ चेतविला
भारती सर्व पसरविला
वीराची आहुति पडता आता
तेज चढे अध्वरा!१

यम शत्रु न आता अत्र
होऊनि पातला मित्र
कर धरा तयाचा संतोषाने
पाचारण स्वीकरा!२

आव्हान न आता देणे
शांतिरूप केवळ उरणे
या असीमात हो अनंतात हो
विलयावे वीरा!३

मनि आस फळाची नव्हती
कर्मात शोधिली तृप्ती
विचारक्रांती घडवायासी
लढला झुंजारा!४

ही नरकाया नच पडते
जणु वज्रसमिध ही वाटे
संतोष कलश हा पुण्य करोनी
परमात्म्या वितरा!५

मागे न पुढेही काही राहियले
'मी'पण ही लेश न आता उरलेले
घ्या भावांजली ही प्रिय अनुजाची
शांतिद-जलधारा!६

रचयिता : श्रीराम बाळकृष्ण आठवले