दीपज्योतीस

दीपशिखे तू जळत रहा

तव प्रकाशी मना जाणवो 
ज्वलनांतरिही शीतलता ! ध्रु.

नाचत नाचत उजळ मुखश्री
मनामनातील फुलव वनश्री
'जीवन अपुले दुसऱ्यासाठी'
घोष अंतरी घुमो महा!१

मंद तेवुनी चिंतन शिकवी
आत्मबोधनी वृत्ति रंगवी
स्वतेजाने मना उजळुनी
ईशचरणि अंजली वहा!२

तुझ्या गुणांची प्रभुला पारख
तव जळण्याचे तयास कौतुक
पूजाद्रव्यी तुला लाभले
स्थान अलौकिक, जळत रहा!३

द्वैतभावना उरली नाही
मी विश्वाते व्यापुनि राही
मदंतरी क्षण डोकावुनि तू
तुझेच अक्षय रूप पहा!४

रचयिता : श्रीराम बाळकृष्ण आठवले
(गीतादर्शन - मार्च १९७०)