Monday, February 26, 2018

स्वतंत्रतेच्या वीरा, तुजसी कोटि प्रणाम, तुज कोटि प्रणाम!




स्वतंत्रतेच्या वीरा, तुजसी
कोटि प्रणाम, तुज कोटि प्रणाम! ध्रु.

तू तेजस्वी मार्तंडासम
बलसागर तू वायुसुतोपम
मृत्युंजय वीरा, भास्वरा
विनम्र होती किती अनाम!१

ज्वलंत ज्वालामुखी भासशी
रणसिद्धांता ठाम मांडशी
सोनेरी पानांच्या द्रष्ट्या,
जरि झालासी तू बदनाम!२

तुझिया देशी तुझी उपेक्षा
तुवा न धरली एक अपेक्षा
तू निरीच्छ, तू दधीचि दुसरा
आणु कोठुनि तुज उपमान!३

तू कर्णाहुनि उदार दाता
लाजविले मृत्यूला मरता
आत्मार्पण तव विस्मित करिते
जीवन धन्य नि मृत्यू महान!४

कवी : श्रीराम बाळकृष्ण आठवले

Sunday, February 25, 2018

भाग्याला काय उणे? यत्न करी! यत्न करी! ध्रु.


भाग्याला काय उणे?
यत्न करी! यत्न करी! ध्रु.

कर विचार काय सार
सोडुन दे जे असार
शुद्ध बुद्ध होशि तरी ! १

जरि विकार करि प्रहार
कर विवेक घे न हार
दक्ष राही नित्य तू अंतरी ! २

बोलत जा वचन असे
हृदया जे सुखवितसे
मधुर मधुर भाव वसो अक्षरी ! ३

तू विषण्ण जग विषण्ण
तू प्रसन्न जग प्रसन्न
बिंब प्रतिबिंब भाव जाण तरी ! ४

मी पणास विसर त्वरे
प्रेमभाव त्यास पुरे
सर्वात्मक होइ नरा निमिष तरी ! ५ 

वचन जसे वाग तसे
संगति सुख देत असे
नीतीने न्यायाने वाग तरी ! ६

होउ नको देहदास
होई होई रामदास
सार्थक नर जन्माचे खचित तरी ! ७

१९ जानेवारी १९७७
कवि : श्रीराम बाळकृष्ण आठवले

Saturday, February 17, 2018

तो काळ असाही होता.

तो काळ असाही होता तो काळ असाही होता! ध्रु.

त्या स्वतंत्रता समरात
तळपली निमाली ज्योत
लावुनी पणा निजप्राणा ‘वासुदेव’ गेला होता ! १

हे स्वराज्य गेले गेले
हे शल्य अंतरी सलले
भीमासम गट युवकांचा मनि अग्नी फुलवित होता ! २

यत्ना जधि यश न मिळाले
मन क्षणभर हिंपुटि झाले
बलिदान न वाया जाते शिकविते जनांना गीता ! ३

जरि राख चितेची झाली
ठिणगी परि चेतुनि उठली
सातत्या न पडो खंड वाटले असे भगवंता ! ४

या स्वदेशमुक्तीसाठी
क्रांतिचि ध्वजा उंचविती
नरवीर रत्नहारीचा तो ‘कौस्तुभ’ जन्मत होता ! ५

लव धर्म हातुनी झाला
तो कधी न वाया गेला
पार्थास बोधिले कृष्णे उपदेश बिंबला होता ! ६

सामान्य रयत घाबरली
स्वत्वाते मुकली भुलली
दडपवि मन परकी सत्ता तो काळ असा होता ! ७

प्रभु निद्रित होता चित्ती
ओळखही पटली नव्हती
थर जाड जाड विस्मृतिचा हृदयांवर जमला होता ! ८

रचयिता : श्रीराम बाळकृष्ण आठवले.

Sunday, February 11, 2018

आरोग्याची गा गाणी..



रोगी कसला? तूही निरोगी
आरोग्याची गा गाणी
निसर्ग असतो मित्र खरोखर
निसर्गचक्रा वाखाणी! १

श्वसनावरती हवे नियंत्रण
नकोस टाकू तू धापा
पंप मजेशीर तूच चालवी
यंत्र हृदय, यंत्री बाप्पा! २

भय कसले रे सांग मला तू
कर्ता भोक्ता नसशी तू
कडेवरी आईच्या बालक
नको बाळगू तू किंतू! ३

उत्साहाने ऊठ राजसा
पाउल टाकाया लाग
जमेल तैसा वेग वाढतो
विश्वासाने तू वाग! ४

डॉक्टर गुरुजी तू विद्यार्थी
करून दाखव तू प्रगती
सहकाराने विश्वासाने
नातीगोती दृढ होती ! ५

भूक लागणे हे भाग्याचे
थोडे थोडे परि खावे
पचे अन्न ते औषध ठरते
मर्यादेने वागावे ! ६

सावधान! हा तुला इशारा
नियतीने तुजला दिधला
सत्संगाने श्रवणे मनने
मार्ग जाहला तुला खुला! ७

रचयिता : श्रीराम बाळकृष्ण आठवले
२८ ऑगस्ट २००४

अभ्यास करावा कैसा?



मन देउन ऐकत जावे
स्मरणात सार ठेवावे
लेखन हा उपाय खासा
अभ्यास करावा ऐसा!१

नावडते हो आवडते
अवघड ना काही वाटे
उत्साह जोडता श्वासा
अभ्यास करावा ऐसा!२

कवितांना लावा चाली
गा प्रेमे वेळोवेळी
यश अपुले धरा भरवसा
अभ्यास करावा ऐसा!३

ना अशक्य काही जगती
भीतीने प्रश्न न सुटती
घ्या सच्छिष्याच्या ध्यासा
अभ्यास करावा ऐसा!४

जे लिहीन शुद्ध असेल
वाचता छान वाटेल
गुरु जवळी घेती शिष्या
अभ्यास करावा ऐसा!५

रचयिता : श्रीराम बाळकृष्ण आठवले
२४ डिसेंबर २००३

Tuesday, February 6, 2018

गड आला पण सिंह चालला, सिंह चालला!



आज शिवा जिवलगास मुकला
गड आला पण सिंह चालला ss
सिंह चालला! ध्रु.

लगिन राहिले जरी रायाचे
भान नरवीरा तुला कोठचे?
कोंडाण्यावर जीवभाव त्वां ओवाळुनि टाकला
गड आला पण सिंह चालला,
सिंह चालला!

क्षात्रगौरवा गुणगंभीरा
सुभेदार घ्या माझा मुजरा
जाताना कीर्तिच्या मंदिली विजयतुरा खोविला
गड आला पण सिंह चालला,
सिंह चालला!

गेला बाजी, मुरारबाजी
पुढे चालला हा तानाजी
धन्य तुम्ही रण शयनी निजण्या मान तुम्हां लाभला
गड आला पण सिंह चालला,
सिंह चालला!

रचयिता : श्रीराम बाळकृष्ण आठवले