आई तुझ्या कुशीत मी सान मूल व्हावे!

आई तुझ्या कुशीत मी सान मूल व्हावे!
मांडीवरी निजावे, प्रेमे तुला पहावे!ध्रु.

हलकेच थोपटी गे, म्हण चार गोड ओव्या
गंधीत वायुलहरी अति मंद मंद याव्या
तव स्पर्शसौख्य आई माझ्या तनी मुरावे!१

डोळे मिटून घेतो जरि झोप येत नाही
फिरवी करास पाठी ना आस अन्य काही
माझ्या तनात अवघ्या अमृत पाझरावे!२

झालो कितीही मोठा तुजसाठि मी लहान
संकोच ना मनाला कुरवाळि बाळ सान
माझ्या मनोरथाने मज शैशवात न्यावे!३

रचयिता : श्रीराम बाळकृष्ण आठवले
(श्यामची आई वर आधारित कविता - लेखनकाळ सप्टेंबर १९७३)