हर हर महादेव बोला!

छातीचा करुनी कोट आडवू सागरलाटेला
हर हर महादेव बोला!ध्रु.

धोंड्यांचा भडिमार करावा
गनीम गडगड लोळत जावा
परिसर हा रक्तात भिजावा
तलवारी, भाल्यांवर झेलू शत्रुचा हल्ला!१

महाराज, तुम्हि गडी पोचणे
अमुची चिंता मुळी न करणे
अमुचे होइल येथे सोने
तलवारीतुन अता आगिचा लाल लोळ चेतला!२

खिंडीमध्ये अडसर होतो
शिकस्त करुनी झुंज झुंजतो
सारी ताकद पणा लावतो
तोफांचा आवाज ऐकण्या बाजी आतुरला!३

देह पिंजला भले पिंजु दे
रक्त गळाले, गळो, गळू दे
परि आम्हाला यश लाभु दे
स्वराज्यसूर्या प्रसन्न हो परि तुझिया भक्ताला!४

पहिली तोफ उडाली धडडड
शांत जाहली मनिची तडफड
स्वराज्य राहो यास्तव धडपड
हर हर गर्जत बाजी भेदी अंति सूर्यमंडळा!५

रचयिता : श्रीराम बाळकृष्ण आठवले