अवचित रामायण स्फुरले

क्रौंचमिथुन प्रणयात रंगता

सशर थांबला व्याध मागुता
शर लागुनिया नर कोसळता
मुनिवर कळवळले, रामायण स्फुरले!

रुद्ध गळ्यातुन उमटत ना स्वर
अश्रुसरी ओघळल्या सरसर
शरीर अवघे कापे थरथर
मना न राहवले, रामायण स्फुरले !

दोन जिवांची करुण कहाणी
चित्रित करता नयनी पाणी
क्रौंचवधाची अमर निशाणी
शब्दशिल्प सजले, रामायण स्फुरले !
अवचित रामायण स्फुरले!

रचयिता : श्रीराम बाळकृष्ण आठवले