Friday, June 4, 2021

श्रीकृष्णाची भूपाळी



प्रातःकाली हे गोविंदा गंधित ये वारा
गोकुळवासी, हृदयनिवासी उठि उठि यदुवीरा!ध्रु.

इंद्रियरूपी गायींना तू आत आत वळवी
सोऽहं मुरली वाजवुनी तू आत्मसुखी रमवी
साधकास तर नित्य साधना दीपावलि दसरा!१

चित्तचोर तू गोपींना त्या भावमयी केले
असुनि प्रपंची विषयातुनि त्या दूर दूर नेले
गीता शिकवी जीवनविद्या नंदाच्या कुमरा!२

धर्म तिथे जय, नीति तिथे जय, पटले आम्हाला
कर्तव्याने घडतो मानव कळले आम्हाला
बिंदु बिंदु सागरी मिळावा, घडवी योगेश्वरा!३

स्वातंत्र्याचा अर्थ कळू दे स्वराज्य हे व्हावे
जागृत होवो दिव्य अस्मिता राष्ट्र उभे व्हावे
तुझे सुदर्शन दे आश्वासन भयास ना थारा!४

मुक्त जन्मला कारागारी अद्भुत हे घडले
परवशतेचे पाश क्षणार्धी खळाखळा तुटले
प्रणाम करि श्रीराम प्रभाती तुजला यदुवीरा!५

रचयिता ; श्रीराम बाळकृष्ण आठवले
२४.०७.१९९५

No comments:

Post a Comment