मायतात विठ्ठल रखुमाई
घर पंढरी होई
कीर्तन एकादशी साजरी
तो करवुन घेई!ध्रु.
महिन्यातुन एकदा जमावे
हरिदासाचे श्रवण करावे
ऐकुन घेउन भजन म्हणावे
सुधारणा होई!१
ज्ञाना दिसतो ओवीमधुनी
तुका हासतो अभंगातुनी
मोरोपंतहि आर्येमधुनी
प्रसाद करी येई!२
कीर्तन रंगे श्रोत्यांसंगे
डुलती माना जीव तरंगे
विवेक आपोआपच जागे
पुनर्जन्म होई!३
येथे येता श्रवता विठ्ठल
चंचल मनही होते निश्चल
भक्तीचा दरवळतो परिमल
अनुभवास येई!४
अवघड कोडी श्रवणे सुटती
कलह संपती नाती जुळती
वाढत जाते गुणसंपत्ती
सिद्धि नव्हे का ही?५
रचयिता : श्रीराम बाळकृष्ण आठवले
२६.११.२००१
