Tuesday, February 1, 2022

रेडा वेद बोले!

अघटित घडले पैठणनगरी, वैदिक चक्रावले!
रेडा वेद बोले! ध्रु.

अहंभाव हे सावट जेथे
ज्ञानभास्करा ग्रासु पाहते
चमत्कार परि दिसता थक्कित जाहलीत द्विजकुळे!१

रेडा भासत केविलवाणा
ज्ञानाहाती अपार करुणा
अश्रू त्याचे ज्ञानाचरणी ठिबकत जैसी फुले!२

नादलहरी त्या क्षणात जुळल्या
त्वचा थरथरे अद्भुत माया
संथा घेउनि भावभरे मग घनगर्जनसम बोले!३

निश्चल गोदा, पवन थांबला
काल वाहता झणि गहिवरला
साक्ष पटे मग शुद्धत्वाची सहस्र कर जुळले!४

सर्वाभूती एकच ईश्वर
मानुनि  डुलले ते पंडितवर
ज्ञानी अज्ञानी सगळे जन चरणांसी लागले!५

रचयिता : श्रीराम बाळकृष्ण आठवले
२५.०६.१९७३

No comments:

Post a Comment