केडगावची अतिशय प्रेमळ नारायण माउली

केडगावची अतिशय प्रेमळ नारायण माउली 
पुन्हा पुन्हा या बेटावरती स्मितवदने वदली! ध्रु.
 
श्रीनारायण जय नारायण दत्त दत्त बोला 
आत्म्यावर विश्वास ठेवुनी आनंदे डोला 
वेदनेवरी आपण होउन फुंकर ती घाली!१ 

संध्यावंदन समय न चुकवा परमलाभ होई 
गायत्रीच्या मंत्रोच्चारे मळ धुतला जाई
दारे खिडक्या प्रभातसमयी ठेवा पूर्ण खुली!२ 

का बाऊ करणे दुखण्याचा दत्तनाम घ्यावे 
थोडे थोडे भस्म घेउनी देहा लावावे
खडीसाखर या रसनेवरती अलगद विरघळली!३ 

अनुग्रहच नारायणगुरुचा कर फिरला देही 
मन हो सुस्थिर भक्ता केले जसे वज्रदेही 
शिकवा बाळा रोग पिटाळा आठवल्या ओळी!४ 

सत्यच नारायण पटण्याला सामूहिक पूजने 
समरसता साधाया पोषक अन्नदान घडणे 
धर्म सनातन रक्षणकर्ता नाडी ओळखली!५ 

रसिकांचा राजाच जसा हा दीनांचा बंधू 
कुशल संघटक हेच बिंबवी तुम्ही आम्ही हिंदू 
छुपे आक्रमण धर्मावरचे थोपवी त्या वेळी!६ 

सत्य न मरते अपप्रचारे अंतर्मन साक्ष
कर्तव्याच्या पालनात प्रत्येक असो दक्ष
परानुकरणाची दृढ बेडी क्षणार्धात तुटली!७ 

रचयिता : श्रीराम बाळकृष्ण आठवले
१६ ऑक्टोबर २००३