साईराम साईराम मुखे म्हणा

साईराम साईराम मुखे म्हणा हो मुखे म्हणा
श्रीसाईला ये पान्हा!ध्रु.

भार घेत निज शिरावर
भक्तसखा श्रीरमावर
उत्कटतेने गा भजना!१

न कळे कुठल्या रूपाने
देव धावतो प्रेमाने
प्रेमरूप साई जाणा!२

देहदु:ख सुख मानावे
हासत घावहि सोसावे
रंग चढू दे गुरुभजना!३

आत आत जे दडलेले 

शोधा शोधा ते पहिले
बसा आसनी याच क्षणा!४

सुख साईला मागावे
दुःखहि त्याला सांगावे
आईलागी प्रिय तान्हा!५

भाव हृदयि दृढ धरा धरा
सोऽहं भावे भजन करा
शांतिच शांती ये सदना!६

साधक बसता ध्यानाते
सदनच शिरडी झणि होते
भिऊ नका मुळि विघ्नांना!७

रचयिता : श्रीराम बाळकृष्ण आठवले
०९.१०.१९७६