लुटु या आनंद

मी नर नारी भेद विसरु या साधू संवाद 
शिवशक्तीचा खेळ सनातन लुटु या आनंद!ध्रु.

दोन करांनी वाजे टाळी दोन ओठ गाती 
बघती डोळे दोन तसे ते चरण दोन चालती 
परस्परांना पूरक आपण सादा प्रतिसाद!१ 

मायतात का कधी वेगळे समरस ते असती 
वेल कशी ती सरसर चढते वृक्षाच्या वरती 
घराघरातुन एकच घुमतो प्रणवाचा नाद!२ 

असो पुत्र वा असु दे कन्या ऐक्याची खूण 
भगवंताचे रूप आगळे घ्यावे निरखून 
देहाचा अभिमानच मोठा असतो अपराध!३

भाऊबहिणी खेळ खेळती आनंदे हसती 
आनंदाच्या अनंत मार्गी करताती प्रगती 
सीताराम जय सीताराम तोडत भवबंध!४ 

अभ्यासाचा छंद लागला देहातच मुक्ती 
वाढत जाते नित्य निरंतर देवाची भक्ती 
मी राधा मी कृष्णच गाते मन मग बेबंद!५

प्रवास येथे आहे उलटा बाहेरुन आत 
विकारावरी विवेक करतो कौशल्ये मात
संतकृपेचा साधक सगळे सेवू मकरंद!६ 

रचयिता : श्रीराम बाळकृष्ण आठवले 
८ मे १९९१
उगवती पहाट २.२५