आरति श्रीरामाची
आरति पुरुषार्थाची । धृ.
राम जीवनी आणायाला
तसे पाहिजे वागायाला
या शुभसंकल्‍पाची । १
‘विवेक’ हे कोदण्‍डच हाती
‘निश्‍चय’ भाता भरला पाठी
जाण पूर्ण सत्‍याची । २
रामा ऐसा बंधू नाही
रामा ऐसा पतिही नाही
कर्तव्‍यस्‍मरणाची । ३
सदाचार श्रीरामच आहे
सद्भावहि तो भरतच आहे
त्‍या भाविक भक्‍तीची । ४
सेवा सादर चरणांपाशी
दिव्‍या शक्‍ती मारुतिपाशी
शरणागत होण्‍याची । ५
सीता तर ‘साधना’ जीवनी
ती समरसता मूर्त होउनी
अनुपमेय जोडीची । ६
चला आठवू राम प्रभाती
सोपवु सगळे रामाहाती
संधी साधायाची । ७
रामकथा ही ऐकायाची
श्रवणे, मनने मुरवायाची
दिव्‍योत्‍कट यत्‍नाची । ८
रचयिता : श्रीराम बाळकृष्‍ण आठवले
No comments:
Post a Comment