आरोग्याची गा गाणी..

रोगी कसला? तूही निरोगी

आरोग्याची गा गाणी

निसर्ग असतो मित्र खरोखर

निसर्गचक्रा वाखाणी! १

श्वसनावरती हवे नियंत्रण

नकोस टाकू तू धापा

पंप मजेशीर तूच चालवी

यंत्र हृदय, यंत्री बाप्पा! २

भय कसले रे सांग मला तू

कर्ता भोक्ता नसशी तू

कडेवरी आईच्या बालक

नको बाळगू तू किंतू! ३

उत्साहाने ऊठ राजसा

पाउल टाकाया लाग

जमेल तैसा वेग वाढतो

विश्वासाने तू वाग! ४

डॉक्टर गुरुजी तू विद्यार्थी

करून दाखव तू प्रगती

सहकाराने विश्वासाने

नातीगोती दृढ होती ! ५

भूक लागणे हे भाग्याचे

थोडे थोडे परि खावे

पचे अन्न ते औषध ठरते

मर्यादेने वागावे ! ६

सावधान! हा तुला इशारा

नियतीने तुजला दिधला

सत्संगाने श्रवणे मनने

मार्ग जाहला तुला खुला! ७

रचयिता : श्रीराम बाळकृष्ण आठवले

२८ ऑगस्ट २००४