मी चुकलो शिकतच नाही शिकवा ना मजसी साई..

ऑडिओ - मी चुकलो शिकतच नाही

मी चुकलो शिकतच नाही
शिकवा ना मजसी साई! ध्रु.

कामात खोल मी बुडलो
स्वत्वाला मुकलो मुकलो
रडतो मी धाई धाई!१

क्रोधात स्वतः मी जळतो
कितिकांना दुःखी करतो
मज सुशांत बनवा साई!२

लोभाचे मोहक जाळे
कुणि मार्गी पसरून दिधले
रुततो मी ठाई ठाई!३

मत्सर तर अंतरि भरला
मी सदाच गुदमरलेला
मज मुक्त श्वास द्या साई!४

का नाम न वदनी येते?
का ध्यान न मजला रुचते?
तुम्ही स्वामी सद्गुरु साई!५

लोटला देह हा चरणी
मज तार मार वा जननी
माझे नच उरवा काही!६

मम मना सुमन होऊ दे
चरणांशी स्थान मिळू दे
श्रीराम विनवितो पायी!७

रचयिता : श्रीराम बाळकृष्ण आठवलेे

०३.०८.१९७६