आरती गाऊ साईनाथा उदारा विश्वाच्या नाथा....

आरती गाऊ साईनाथा
उदारा विश्वाच्या नाथा!ध्रु.

माझे दत्तगुरु साई
होऊ कैसा उतराई?
तत्पदी टेकवीन माथा!१

सारखे शिरडी बोलविते
अनावर उत्सुकता होते
झरतसे अश्रूंची सरिता!२

कोण मी? कोठुनि गा आलो?
मीच मज कैसा विस्मरलो?
तोच मी! बिंबू दे आता!३

नाम हे मधुर मधुर साई
वाटते चित्ता अंगाई
उदी ही तीट होय भक्ता!४

प्रेममय जीवन हे व्हावे
दुजेपण निमिषी विलयावे
"तथास्तु" म्हणा साईनाथा!५

स्वरूपी रमती ते संत
जनासी धीर देत संत
भक्तिपथ दिसो गुरुनाथा!६

अहंता पूर्ण पूर्ण जावी
माधवी वृत्ती रंगावी
"राम" नच मागे अधिक!७

रचयिता: श्रीराम बाळकृष्ण आठवले