प्रकटले गजानन शेगावी

घटना किति अद्भुत मानावी
प्रकटले गजानन शेगावी!ध्रु.

वद्य सप्तमी माघाची
मूर्ति विलसली योग्याची
थक्कित होती मेधावी!१

भाव न उरला आपपर
सिद्धयोगि हा दिगंबर
शिते लीलया वेचावी!२

नासाग्री खिळली दृष्टी
दिव्य दिसे वदनी दीप्ती
ब्रह्मखूण की पटवावी!३

भावार्थ कृतीचा उमजेना
अन्नात देवपण दिसेचना
मौनेच सत्कृती जाणावी!४

शिरि भास्कर तळपे तमा नसे
देहावर योगी कधी असे?
नित आत्ममाधुरी चाखावी!५

विश्वासी साधे समरसता
भाविका भावली सात्त्विकता
स्मरणातही वृत्ती रंगावी!६

ब्रह्मेच चराचर व्यापियले
मग भेद सहजची मावळले
अद्वयानुभूती लाभावी!७

रचयिता : श्रीराम बाळकृष्ण आठवले
८.७.१९७६