बाळ जाहला बळवंत..

मुलाच्या नाजूक तब्येतीची मातेला काळजी वाटायची.
पण श्रेष्ठ मनोबलाच्या आधारे कॉलेजचे पहिले वर्ष टिळकांनी शक्ति संपादनासाठीच खर्च केले. शारीरिक दुर्बलतेचे नाव देखील उरले नाही.  बाळाचा "बळवंतराव" झाला ...

नसेच दुनिया कमजोरांची
जगी मात हो बलदंडांची!
पाया भरभक्कम शक्तीचा
त्यावर इमला कर्तृत्वाचा
बाळ मनस्वी याच विचारे
घुमे तालमित दिनरात- बाळ जाहला बळवंत!

शरीर तर धर्माचे साधन
करण्यास्तव सत्त्वाचे रक्षण
शक्ती आधी, नंतर विद्या
आपत्तींशी झुंज झुंजु द्या
जोर काढुनी मारुनि बैठक
शड्डु ठोकिती झोकात- बाळ जाहला बळवंत!

अंगांगातुनि रक्त सळसळे
हृदयातिल चैतन्य खळाळे
नमस्कार सूर्यास घालिता
भूमीवरती चित्र उमटता
भिंतींना देताक्षणि धडका
हादरती त्या कंपात- बाळ जाहला बळवंत!

जे जे खावे पचुनी जावे
शरीर गोटीबंद दिसावे
आग भुकेची पोटी उठता
दूध चरविभर देत शांतता
बळकट पिंडऱ्या भरीव छाती
स्नायु जसे की पोलाद- बाळ जाहला बळवंत!

जली वाहत्या उडी ठोकावी
एका हाती भाकर खावी
या तीराहुन त्या तीराला
अनेक फेऱ्या मारित जाव्या
पहिले वर्षच दिले तालमिस
जगाआगळी ही रीत- बाळ जाहला बळवंत!

रचयिता : श्रीराम बाळकृष्ण आठवले