विठ्ठल विठ्ठल नाम घेता नामदेव जागे, मन्‍मनी नामदेव जागे..

विठ्ठल विठ्ठल नाम घेता नामदेव जागे

मन्‍मनी नामदेव जागे

असे जाणवे,  एका वेळी विठ्ठल पुढती मागे ! ध्रु

नामासाठी जो अवतरला

नामी रमला नामे तरला

भक्ति वेढिते देवाभवती चिवट रेशमी धागे ! १

भाव ओतला मूर्ति हालली

नाम्‍यासाठी दूधही प्‍याली

अगाध लीला देवाजीची पिढी पिढीला सांगे ! २

मनास नामे उलटे केले

आत वळविले,  आत रमवले

सोSहं अनुभव येत भाविका सहज समाधी लागे ! ३

रचयिता : श्रीराम बाळकृष्ण आठवले