संते सिद्ध करुनी दिले, नाम भगवंताचे!

संते सिद्ध करुनी दिले, नाम भगवंताचे!ध्रु.

नाम घ्यावे उठाउठी
थोर लाभ नामापोटी
ज्ञान होण्या देत दृष्टी - नाम भगवंताचे!१

नाम घ्यावे येताजाता
नुरे कसलीच चिंता
करी वेदनांसी वेद - नाम भगवंताचे!२

नाम घ्यावे श्वासोच्छ्वासी
नाम घ्यावे आनंदासी
कलीयुगी चिंतामणी - नाम भगवंताचे!३

रचयिता : श्रीराम बाळकृष्ण आठवले

गोंदवलेकर महाराज यांची प्रवचने मधील प्रवचन क्रमांक १९० (८ जुलै) वर आधारित काव्य.

खरा सत्पुरुष तोच की जो भगवंताच्या नावाने देहधारी जीवांना आणि वासनेमध्ये गुरफटून गेलेल्या पिशाच्चांना चांगल्या अवस्थेला घेऊन जातो. मनुष्याने चिकित्सा करावी पण चिकित्सेचा हेतु शुद्ध असावा. सत्य काय आहे हे शोधण्यासाठी जर चिकित्सा केली तर त्याचे मार्ग निराळे असतात. दुसऱ्याला ताप देणे ही चिकित्सा नव्हे.