वाजे सनई, झडे चौघडा, सह्याचल हासला
शिवनेरीवर आज खरोखरउष:काल जाहला!
उषःकाल जाहला!ध्रु.
पूर्वा रंगे, वात सुगंधित, विहंग झेपावले
बालरवीच्या स्वागतार्थ सुर पूर्वेला पातले
उमले आशा नुरे निराशा, उच्च स्वर लागला!१
नद्या नि वारे, अग्नी तारे सारे आनंदती
दिन सोन्याचा का रत्नांचा, शब्द थिटे पडती
युगायुगांनी असा सुखद क्षण नियतीला गवसला!२
शुभ संवत्सर, शिव संवत्सर शुक्ल नाव साजले
आज गडाचे तोंड साखरेहुनी गोड झाले
बारा वाटा खळाळणारा जलौघही गर्जला!३
भाग्य उदेले पृथ्वीचे या कुमार जन्मामुळे
दिग्विजयी सुत वदे कुंडली ग्रह हर्षे डोलले
विघ्नेशाचा आशीर्वचना कर ही उंचावला!४
रामजन्म अन् कृष्णजन्म ही सुदिनी या वाटले
या बाळाच्या मुठीत इवल्या भाग्य सुखद हासले
वेदमूर्ती आशीर्वच देती - काल क्षण थांबला!५
चिमणा तान्हा जमविल सेना स्वप्न माय पाही
मुखचंद्रावर त्या बाळाच्या दृष्टी स्थिर राही
भाग्यलेख जणु बालललाटी विधिनेही लिहिला!६
आज पावली देवि शिवाई, कृपा थोर झाली
जगदंबेने निजकन्येची आस पूर्ण केली
करी घेउनी जीव सानुला पुनःपुन्हा चुंबिला!७
रचयिता : श्रीराम बाळकृष्ण आठवले
No comments:
Post a Comment