उगवले युग हे शौर्याचे! उगवले युगच विक्रमाचे!
किल्ल्यांमागुनि किल्ले घ्यावे
झेंडे गगनी उंच डुलावे
जयघोषे अंबर कोंदावे
बाहु स्फुरण्याचे! उगवले युगच विक्रमाचे!
वृद्धांअंगी यौवन आले
बोरूंचे क्षणि भाले झाले
द्विजांतरी क्षात्रत्व प्रकटले
वेड लढायाचे! उगवले युगच विक्रमाचे!
टिपरी नौबतिवरती पडली
झुंज वादळी सुरू जाहली
रणी जयश्री प्रसन्न झाली
भान न देहांचे! उगवले युगच विक्रमाचे!
विजयीवार्ता दौडत सुटल्या
आक्रमणाच्या वाटा अडल्या
समशेरी गनिमांवर पडल्या
भाग्य स्वराज्याचे! उगवले युगच विक्रमाचे!
रंग ध्वजाचा अपुल्या भगवा
त्यागाचाही रंगच भगवा
त्यागदेव त्यागे पूजावा
ठाउक नित्याचे! उगवले युगच विक्रमाचे!
वीरांच्या त्या रक्तामधुनी
पतिव्रतांच्या कुंकवातुनी
अग्नीच्या त्या ज्वालांमधुनी
स्फुरले गायन विजयाचे! उगवले युगच विक्रमाचे!
अग्नीच्या त्या ज्वालांमधुनी
स्फुरले गायन विजयाचे! उगवले युगच विक्रमाचे!
रचयिता : श्रीराम बाळकृष्ण आठवले
No comments:
Post a Comment