ऐसे स्वराज्य व्हावे!

जणु रामराज्य दुसरे, ऐसे स्वराज्य व्हावे!

ऐसे स्वराज्य व्हावे! ध्रु.

कर्तव्यदक्ष राजा, ती राजनिष्ठ जनता
जर पितृतुल्य राजा, त्याची असीम ममता
राजा प्रजाजनांचे नाते असे जुळावे! १

हे राज्य स्वावलंबी, व्हावे पुरे समर्थ
हे शस्त्रसज्ज होवो, मग चिंतिणे किमर्थ
घरदार, शेतीभाती, निश्चिंत सर्व व्हावे!२

रग नित्य वाढवावी, अभिमान वाढवावा
प्रोत्साहनास द्यावे, झेंडा नभी डुलावा
संरक्षणा समर्थ त्यानेच सूत्र घ्यावे!३

हा राज्यभार वाहे विश्वस्त तो प्रजेचा
राजा म्हणून म्हणवे तो दास या प्रजेचा
करि वाण हे सतीचे त्याचे तया कळावे!४

खंबीरता जयाची इतरास धैर्य देते
ती चेतना जयाची इतरांस वेग देते
ते राज्य सर्व घटका आनंदधाम व्हावे!५

नांदो समर्थ शांती म्हणूनीच युद्धसिद्ध
होवो न मानहानी म्हणूनीच नित्य सिद्ध
जगि माय तात राजा ऐसे प्रतीत व्हावे!६

नित हाल, नाश, कष्ट रुचती कसे प्रजेला
ते स्थैर्य धैर्य लाभो जो तो असे भुकेला
कथिता न एक शब्द त्याला पुरे कळावे!७

रचयिता : श्रीराम बाळकृष्ण आठवले