रामकृष्ण गा मना

राम राम राम राम राम राम गा मना
कृष्ण कृष्ण कृष्ण कृष्ण कृष्ण कृष्ण गा मना
राम कृष्ण राम कृष्ण राम कृष्ण गा मना!ध्रु.

राम अंतरातला तोच नाम घेववी
कृष्ण हा करातला तोच कार्य साधवी
धैर्य ठाम बाळगी सचेतना मना मना!१

देहदुःख सोसणे तप न या विना दुजे
गात गीत हासणे जप असेच जाणिजे
अर्थ जीवनातला शोध शोध रे मना!२

अनादि तू अनंत तू पुन्हा पुन्हा बजावतो
तूच पार्थ कृष्ण तू तुझे तुलाच सांगतो
ज्ञानदेव नामदेव तूच रे पहा खुणा!३

रडू नको झुरू नको खचू नको मना कधी
संधि साध नेमकी सापडे कधी मधी
सावधान सावधान सावधान हो मना!४

रचयिता : श्रीराम बाळकृष्ण आठवले
२७.६.२०००