अर्जुन केवळ निमित्त आहे -

अर्जुन केवळ निमित्त आहे
गीता तुमच्या माझ्यासाठी
गीताई सगळ्यांच्यासाठी!

खचलेल्याला हिंमत देते
झुंजाया प्रोत्साहन देते
जय की पराजय गौणच गोष्टी!

आपण कर्तव्यास भिडावे
फलाशेत ना कधी गुंतावे 
यज्ञ म्हणुन गौरवी जगजेठी!

भगवंताच्या अधरी पावा
त्यास हवा तो स्वर निपजावा
आपण साधन संत समजती!

अहंकार पुरताच लोपला
सोऽहं मनगाभारी घुमला
आत्मचिंतनी रंगे सुमती!

लढुन मरावे, मरुन जगावे
कीर्तिमंत, यशवंत बनावे
गीता गावी जगण्यासाठी!

विकारांवरी मात करावी
यत्ने मिळवू संपद् दैवी
धर्म तिथे जय खचित शेवटी!

रचयिता : श्रीराम बाळकृष्ण आठवले
२६.१०.२००४

नवनाथांची आरति गाता शांतिच शांती चित्ताला

नवनाथांची आरति गाता
शांतिच शांती चित्ताला!
भक्तिभावना अंतरि उमले
सुगंध लाभे जगताला!ध्रु.

अद्भुतता ही इथली ऐसी
विस्मय होई चकित स्वतः
प्रमुदित तन मन, प्रमुदित बहु जन
गंधित होई गंध स्वतः
नवनाथांचे घडते दर्शन
भाविक कणकण मोहरला!१

चित्त शुद्ध तर शत्रु मित्र हो-
प्रेमाने जग जिंकावे
मी माझेपण पुरते लोपुन
तो मी, तो मी उगवावे
नवनाथांच्या कथावाचने
प्रसाद अवचित करि आला!२

श्रीकृष्णाची मधुर बासरी
शिव शंभूचा शंख गमे
डम डम डम डमरू बाजे
दिव्यानंदी जीव रमे
कथा वाचता कळे न कोणा
श्रावण कैसा रिमझिमला!३

भयास आता थारा नाही
निर्धारे मन दृढ झाले
द्वेषाला तर जागा नाही
सारे येथे समरसले
धूप दीप भारती मनाला
सूर गायका सापडला!४

अनाथ जगती कोणी नाही
गुरु माउली गुरु तात
शिष्याला संकटी हात दे
ऐसा नाथांचा नाथ
मालुकवीने ग्रंथलेखने
अमोल ठेवा दिधलेला!५

रचयिता : श्रीराम बाळकृष्ण आठवले
१४.०७.१९८६

फादर्स डे निमित्त ग्रंथ भारती मध्ये आलेला लेख " माझ्या आठवणीतले आमचे अण्णा अर्थात श्रीराम आठवले

 

ठेवू या आपण ध्यानी

 ठेवू या आपण ध्यानी - ऑडिओ

भगवंताने देह दिला ठेवू या आपण ध्यानी
अलंकार सद्गुण सारे सजव तनु गुणसुमनांनी!ध्रु.

देहामध्ये राम असे देहामध्ये कृष्ण असे
देहामध्ये भाव असे देहामध्ये ज्ञान असे
भविष्य अपुले नोंदवही ती ती भरु दे सत्कर्मांनी!१

बालवयी शिक्षण घेणे यौवनात उद्यम करणे
प्रौढपणी कौतुक करणे वृद्धपणी शैशव जपणे
हवेहवेसे तर सगळ्यांना नकोनकोसा अज्ञानी!२

भास्कर देई तेजाला वारा सुखवी अंगाला
चंद्र स्फुरवी प्रतिभेला उषःकाल कर्तृत्वाला
सदासर्वदा निसर्ग साथी जाऊ त्याशी समरसुनी!३

षड्रसभोजन सेवावे सात्त्विक सुंदर मन व्हावे
परिश्रमा नच बिचकावे घर्मजले न्हावे धावे
कृतार्थता ये तरी जीवनी अमृत सिंचन  हरिभजनी!४

धर्माने मिळवू दाम संयमात सेवू काम
मोक्ष नांदतो मोदात साधू चारी पुरुषार्थ
सत्संकल्पा श्रीहरि दाता त्या सम ना कोणी दानी!५

नर नारी आत्मा एक राव रंक आत्मा एक
सान थोर आत्मा एक उच्च नीच आत्मा एक
अनेकातले बघू एकपण जग जोडू गुण धाग्यांनी!६

रचयिता : श्रीराम बाळकृष्ण आठवले
५.६.१९८७

गीतेला भेटत जाई..

गीतेला भेटत जाई - ऑडिओ

गीतेला भेटत जाई गीता ही आहे आई!ध्रु.

ती भगवंताची वाणी
जग सर्व हिला वाखाणी
साहित्यरूप कृष्णाचे सहवास निरंतर देई!१

हा देह दिसे नि नासे
जाणता दुःखी हे कैसे
अजरामर आत्मा असतो गीता हे सांगत राही!२

जीवन हे युद्धक्षेत्र
ते करणे धर्मक्षेत्र
वैर ना मनी बाळगता मानवा करी रणघाई!३

सांगतो सत्य योगेश
नांदतो आत परमेश
ध्यानात धरी उपदेश त्या जोड कृतीची देई!४

मग सगळी कर्मे यज्ञ
अभ्यासे अज्ञ हि सुज्ञ
अर्जुन ही होतो कृष्ण निजस्वभाव बदलुन घेई!५

रचयिता : श्रीराम बाळकृष्ण आठवले
६.८.२००१

श्रीकृष्ण, श्रीकृष्ण, श्रीकृष्ण गा, गीतार्थ सांगा, गीता जगा.

श्रीकृष्ण, श्रीकृष्ण, श्रीकृष्ण गा
गीतार्थ सांगा, गीता जगा!ध्रु.

कर्तव्य का ते टळते कुणा
आसक्ति हा रोग आहे जुना
द्या स्वार्थ सोडून तो वावगा!१

जो जन्मतो - हे जग सोडतो
या देही, त्या देही नांदतो
दे शोक टाकून राही उगा!२

तो तोल सांभाळ माझ्या मुला
हो शांत भगवंत सांगे तुला
हो योगी आदर्श साऱ्या जगा!३

सत्कर्म तो यज्ञ आहे जगी
सहकार हा मंत्र आहे जगी
हो उद्यमी वीर तू दांडगा!४

ती प्रकृती जाण आधी सुखे
हो साक्षी हा खेळ बघ कौतुके
का भार घेशी माथी फुका!५

जे दिव्य जे भव्य तेही हरि

जे सूक्ष्म, अदृश्य तेही हरी

आस्तिक्य, सद्भाव आधी शिका!६

नैराश्य हे घोर, नामे पळे
कर्तव्य कळले, तेही वळे
नाही पराधीन दावी जगा!७

रचयिता : श्रीराम बाळकृष्ण आठवले
१७.०६.२००४

घराघरात गीता जाऊ दे

घराघरात गीता - ऑडिओ

घराघरात गीता जाऊ दे, जाऊ दे, जाऊ दे

गीता गाता उत्साहाचे वारे खेळू दे!ध्रु.

श्लोक सातशे करु या पाठ
विश्वासाने माना ताठ
उक्तीपेक्षा कृती बोलकी घडु दे, घडु दे, घडु दे!१

नव्हे देह मी, मन बुध्दि न मी
सोऽहं तो मी, सोऽहं तो मी
मानसगाभारी या सोऽहं घुमु दे, घुमु दे , घुमु दे!२

संस्कृतभाषा शिकून घ्यावी
ज्ञानेशाची ओवी गावी
आचरणी या पालट सुंदर घडु दे, घडु दे, घडु दे!३

वासुदेव मज करि रे अर्जुन
तुला मागतो हे आवर्जुन
ऐहिक काही दुजी वासना नसु दे, नसु दे, नसु दे!४

विवेक दे रे, विचार दे रे
संयम दे रे,  प्रेम शिकव रे
वत्स होउनी धेनूलागी झटु दे, झटु दे, झटु दे!५

आट्या पाट्या खोखो हुतूतू
विसरवताती मी तू मी तू
कर्मातुन ही क्रीडानंदा लुटु दे, लुटु दे, लुटु दे!६

विकार विलसित राजकारणी
गंगेचेही गढूळ पाणी
हाव हावरी नेत्यांची या सुटु दे, सुटु दे, सुटु दे!७

व्यक्ती पांडव समाज माधव
मी माझेपण देवा घालव
विकासास या विश्व न पुरते गमु दे, गमु दे, गमु दे!८

आहाराची कळु दे युक्ती
आरोग्यहि मग अपुल्या हाती
नरनारींना रणनीती ही शिकु दे, शिकु दे, शिकु दे!९

बालयुवांना वृध्दांनाही
राजांनाही रंकांनाही
उपासनेच्या सामर्थ्यावर जगु दे, जगु दे, जगु दे!१०

कसे जगावे शिकवी गीता
कसे मरावे शिकवी गीता
अंधारातुन प्रकाशाकडे जाउ दे जाउ दे जाउ दे!११

रचयिता : श्रीराम बाळकृष्ण आठवले

१५.७.१९९९

श्रीकृष्णाची भूपाळी

श्रीकृष्णाची भूपाळी ऑडिओ

प्रातःकाली हे गोविंदा गंधित ये वारा
गोकुळवासी, हृदयनिवासी उठि उठि यदुवीरा!ध्रु.

इंद्रियरूपी गायींना तू आत आत वळवी
सोऽहं मुरली वाजवुनी तू आत्मसुखी रमवी
साधकास तर नित्य साधना दीपावलि दसरा!१

चित्तचोर तू गोपींना त्या भावमयी केले
असुनि प्रपंची विषयातुनि त्या दूर दूर नेले
गीता शिकवी जीवनविद्या नंदाच्या कुमरा!२

धर्म तिथे जय, नीति तिथे जय, पटले आम्हाला
कर्तव्याने घडतो मानव कळले आम्हाला
बिंदु बिंदु सागरी मिळावा, घडवी योगेश्वरा!३

स्वातंत्र्याचा अर्थ कळू दे स्वराज्य हे व्हावे
जागृत होवो दिव्य अस्मिता राष्ट्र उभे व्हावे
तुझे सुदर्शन दे आश्वासन भयास ना थारा!४

मुक्त जन्मला कारागारी अद्भुत हे घडले
परवशतेचे पाश क्षणार्धी खळाखळा तुटले
प्रणाम करि श्रीराम प्रभाती तुजला यदुवीरा!५

रचयिता ; श्रीराम बाळकृष्ण आठवले

२४.०७.१९९५