Sunday, April 21, 2024

काकड आरती करितो गजानना तुजला

काकड आरती करितो गजानना तुजला 
करितो गजानना तुजला
पाच प्राण जणु पाच दीप हे ओवाळित तुजला । ध्रु. 

अघटित माया, विवस्त्र काया विकार नाहीत 
मानवतेचे बालक नच त्या कृत्रिम माहीत 
सुमने सुमने पूजितात जन स्वामी पदकमला!१

श्वासावरती पूर्ण नियंत्रण भरून ये छाती 
आघातांना हसत सोसणे चिलीम विश्रांती
धूर सोडता अनंत वलये चेतवती तुजला!२

मरणाचे नित स्मरण असावे संयम दे साथ 
कलही त्याला सदैव कटकट प्रेमळ नित शांत 
मौनांकित तव हसरी मुद्रा आवडते मजला!३

माघ मास ती वद्य सप्तमी प्रकट जाहलास 
योगिराज तू अतर्क्य लीला जनां दाविल्यास 
जनी प्रकटणे तसे लोपणे दोन्ही सहज तुला!४

माया ममता मोह टाकणे सत्यच पत्करणे 
असार ते ते दूर सारूनी सार तेच घेणे
विवेक होउन अंतरातुनी बोध करी मजला!५

बहिरंगाला महत्त्व नसते पहा आत आत 
देव पहावा न दिसे सहसा तो तर देहात
तुझी कृपा ही प्रतिभा होऊन आली बहराला!६

रचयिता : श्रीराम बाळकृष्ण आठवले
१९९४

No comments:

Post a Comment