विषयाकडची ओढ लागु दे भगवंताच्याकडे!

विषयाकडची ओढ लागु दे भगवंताच्याकडे!ध्रु

बहुत नाचलो, बहु आरडलो 
बहुत भटकलो, बहु व्याकुळलो
सदया देवा म्हणुनि उभा मी हात जोडुनी पुढे!१ 

भगवत्स्मरणी जे सुख आहे 
मना माझिया घेउनि पाहे
विषयाकर्षण बळे खेचते नेण्या नरकाकडे!२

लोभ नसू दे धुंदि नसू दे 
विठ्ठलछंदे सुखे नाचु दे 
भक्तभार घे राम मस्तकी नुरती कुठले तिढे!३

रचयिता : श्रीराम बाळकृष्ण आठवले
गोंदवलेकर महाराज प्रवचन क्रमांक १६० (८ जून) वर आधारित काव्य.

आपला ओढा जो विषयांकडे आहे तो भगवंताकडे लावा की परमार्थ साधला.  साठा करावा पण लोभ असू नये.

१) प्रपंचात ज्याला विश्वास म्हणतात त्यालाच परमार्थात श्रद्धा म्हणतात.

२) वाईट लोक समाधानात दिसतात पण खरे ते तसे नसतात. वाईट कृत्य करणाऱ्यांना कधी ना कधीतरी पश्चात्ताप झाल्यावाचून राहात नाही.

३) साठा करावा पण लोभ असू नये. उद्योग करावा पण लोकांचे नुकसान करू नये.

४) ज्यात माझे मन मला खात नाही ते काम चांगले असे समजावे.

५) आपला ओढा जो विषयाकडे आहे तो भगवंताकडे लावा की परमार्थ साधला.