मेळ न मुळी बसेना!

जय जय रघुवीर समर्थ

अगणित शास्त्रे शोधू जातां-
निश्चय एक दिसेना
मेळ न मुळी बसेना!ध्रु.

वृथा भांडती वृथा तंडती
सकल आंधळे एकच हत्ती 
विविध विधाने, विविध दर्शने
निर्णय एक ठरेना!१ 

अभिमानासी कारण मिळते
ज्ञान तेवढे लपूनि बसते
अंधाराच्या कृष्णाकाशी 
वाव न प्रकाशकिरणां!२ 

गुरुकृपेने प्रबोध होतो 
अहंभाव तै लोप पावतो
गती मनाची कुंठित होता
गहन अर्थ ये मौना!३

रचयिता : श्रीराम बाळकृष्ण आठवले 
२६.०७.१९७५

खालील श्लोकावर आधारित काव्य.

बहू शास्त्र धुंडाळिता वाड आहे। 
जया निश्चयो येक तोही न साहे॥
मती भांडती शास्त्रबोधें विरोधे
गती खुंटती ज्ञानबोधें प्रबोधे॥

卐

शोधू गेल्यास शास्त्रे पुष्कळ आहेत. पण त्यांचा एकही निश्चय नाही. शास्त्राचा परस्परविरुद्ध अर्थ करून मताभिमानी लोक भांडत असतात. परंतु ज्ञानाचा यथार्थ बोध होऊन मतिप्रकाश झाला म्हणजे मनाची गति कुंठित होते.