तुझे प्रेम लाभू दे, तुझे वेड लागू दे!

तुझे प्रेम लाभू दे
तुझे वेड लागू दे!ध्रु.

मुखी नाम अंतरि राम
हृदय बनो भगवद् धाम
भजन रंगु दे!१

प्रार्थितसे भक्ती रामा
पुरवि पुरवि इतुक्या कामा
नाच नाचु दे!२

राम माउली गे माझे
लडिवाळ तान्हे तुझे
तृप्त होऊ दे!३

रचयिता : श्रीराम बाळकृष्ण आठवले

गोंदवलेकर महाराज यांची प्रवचने मधील प्रवचन क्रमांक १४० (१९ मे) वर आधारित काव्य.

घरामध्ये काय किंवा बाहेर काय प्रेमाचा धाक असावा, भीतीचा धाक असू नये. जसे आई व मुलांचे प्रेम असते, तसे भगवंताचे प्रेम लावावे व त्याप्रमाणे आपण वर्तन ठेवावे. असा नियम आहे की, ज्याला आतबाहेर भगवंताचे प्रेम आले, तो भजनामध्ये नाचत असता त्याचा स्पर्श दुसऱ्याला झाला की तोही भगवंताच्या प्रेमाने नाचू लागतो. भगवंताचे प्रेम हे एक मोठे वेड आहे, ते ज्याला लाभेल तो भाग्याचा खरा. एक भगवंताचे प्रेम लागले, की वाणीमध्ये सर्व चांगले गुण येतात. भगवंताचे प्रेम यायला आपण प्रपंचाची आसक्ती कमी करावी. आपण भगवंताचे प्रेम वाढवण्याची कृती करावी, त्याकरिता आपलेपणा, अनुसंधान व सत्संग हेच तीन उपाय आहेत. भगवंताचे प्रेम हे कोणत्याही साधनाचा प्राण आहे. ते प्रेम मागण्यासाठी रोज भगवंताची प्रार्थना करावी. भगवंताच्या नामाला नीति हे पथ्य आहे. भगवंत हा कष्टसाध्य नसून सुलभसाध्य आहे. जो अडाण्यातील अडाणी आहे, त्याला सुद्धा मिळणारा असा भगवंत आहे. मूल जसे आईच्या अंगावर नाचते त्याप्रमाणे आपण भगवंतापाशी मूल होऊन त्याचे प्रेम लुटावे.