तू आजारी पडशी म्हणजे

तू आजारी पडशी म्हणजे देवाचा अपराधी तू
देह तुझा तो ठेव तयाची मोल न कैसे जाणत तू? ध्रु.

श्री नारायण जय नारायण नरतनु आहे सुंदर साधन
नाम स्मरता, पतितहि पावन सदाचार हा अंगी मुरवुन
हो नारायण संत सांगती रहस्य घे ना जाणून तू !१

जिथून आलो तिथे जायचे मी माझे हे विसरायाचे
चिंतन औषध चिंतांवरचे शिकव मना सगळे रामाचे
विषयी विरक्ती भजनी प्रीती सत्संगी जा रमून तू !२

झाले गेले विसरून जावे, क्षमा धरेचे नाम स्वभावे
घराघरांना जोडत जावे दीनदुःखिता जवळ करावे
आसू पुसता फुलते हासू नयनरम्य हो श्रावण तू! ३

आहारावर आचारावर ठेव नियंत्रण पुरता सावर
मुक्त मनाने विश्वी वावर नाम होउ दे तुला अनावर
जगावयाची भगवद्गीता भगवंताला ओळख तू !४

साहित्याच्या अभ्यासाने मना विस्तरी समरसतेने
पुढे पुढे चल निर्धाराने गाठशील रामाचे ठाणे
प्रकाश ज्ञानाचा मोदाचा देणारा हो दीपक तू!५

रचयिता : श्रीराम बाळकृष्ण आठवले
१६.११.२००१