प्रसन्न ओव्यांमधुनि होतसे गीतार्थाचा पट साकार!

प्रसन्न ओव्यांमधुनि होतसे गीतार्थाचा पट साकार! ध्रु. 

गुरुप्रसादे काव्य बहरले 
श्रोत्यांचे मनमोर नाचले
सुबोध भाष्या अनुभविताना आनंदा ना पारावार !१

ओवीमागुनि ओवी स्फुरते
गंगाजलि मन चिंब नाहते
इंद्रधनूचे रंग जणू की काव्यलेखनी हा भरणार !२

श्रीज्ञानाचे मोहक आर्जव
शब्दयोजनी अपूर्व पाट
पसायदानी श्रीहरि तोषे शांतीचे सुख अपरंपार !३

श्रीगुरु म्हणता सहज तथास्तु
गीतार्थाची प्रपूर्ण वास्तु
हरिभजनाची देत प्रेरणा अध्यात्माची अमृतधार!४

'लेणे देशीकार' घडविले
प्रवरेने मस्तकी घेतले
नगरोनगरी सुकाळु झाला अमृतवेली या फुलणार!५

रचयिता : श्रीराम बाळकृष्ण आठवले
२७.६.१९७३