ओवी ज्ञानेशाची गावी

ओवी ज्ञानेशाची गावी गाता गाता ध्यात जावी 
तनी मनी मुरवावी ज्ञानेश्वरी !१

ज्ञानेश्वरी ग्रंथ गहन सुगम करिता नित्य मनन 
स्वये मोहन दे दर्शन भाविकाला !२ 

भाविकाला विश्व घर कुरुक्षेत्र हे माहेर 
कर्तव्यात मोद फार अभ्यासाने !३

अभ्यासाने सर्व सोपे प्रबोधशक्ती जागी होते 
अंतरंगी आपण येते मृदुपण !४

मृदुपण आईचेच हवे सर्वां सदाचेच 
संतरूप मातेचेच कळो येई !५

कळो येई पसायदाने आता आम्हा काय उणे 
झाले जीवनाचे सोने पूर्वपुण्ये !६

पूर्वपुण्ये हा सत्संग आगळाच भक्तिरंग 
होता सोsहं ध्यानी दंग उजाडेल !७

उजाडेल ऐसी आशा मौनावेल मग भाषा 
उजळेल भाग्यरेषा श्रीरामाची !८

रचयिता : श्रीराम बाळकृष्ण आठवले
१५.५.१९८४