तुजविण मजला कोणी नाही भगवंता मी तुझा!

तुजविण मजला कोणी नाही
भगवंता मी तुझा!ध्रु.

न मागताही मिळे विषयसुख
का करणे परि त्याचे कौतुक?
मिळत तयाने सजा!१

उभा रहा रे माझ्या मागे
दास तुझा एवढेच मागे
भजनी वाटत मजा!२

तुज आठविता नित्य दिवाळी
भावफुले किति उमलुनि आली
उभयहि करु हितगुजा!३

रचयिता : श्रीराम बाळकृष्ण आठवले
गोंदवलेकर महाराज प्रवचन क्रमांक २१५, २ ऑगस्ट वर आधारित काव्य.

भगवंता, तुझ्यावाचून माझे कोणी नाही ’ हे ज्या दिवशी मनाने पक्के ठरेल, त्याच दिवशी समाधान मिळेल. जितकी विषयाची आवड धरावी, तितके दु:खच पदरात येते. विषयसुख न मागताही येते; परंतु जे परमार्थाच्या आड येणार आहे, ते मागत कशाला राहायचे ? माझ्या मागे राम आहे म्हटले, म्हणजे प्रपंचातल्या विषयात जरी राहिलो तरी भिण्याचे कारण नाही. 
आपणच दिवाळीच्या दिवसाला आनंदाचा दिवस करतो. हे जर खरे, तर तसा तो आपण नेहमीच का करू नये ? आपल्याला नेहमीच दिवाळी असावी; आपण नेहमीच आनंदात असावे; आणि त्याकरिता आनंदमय अशा भगवंताचा आधार घ्यावा.