अर्जुन कर हे वासुदेव मज विनवा त्या जुळवून करा!

श्रीकृष्णाचे स्मरण करा, नमन करा, भजन करा,
अर्जुन कर हे वासुदेव मज विनवा त्या जुळवून करा!ध्रु.

जीवन आहे एक रणांगण, इथे लढावे लागे क्षण क्षण
शत्रुमित्र दोन्‍ही निष्कारण, काय करावे नुमजे आपण
रथी करशि तर होइ सारथी सूत्र धर रे करी त्वरा!१

घालव रे संकोच मनाचा, जना करी या जनार्दनाचा
लोप करी रे घनतिमिराचा, प्रवेश होवो रविकिरणांचा
कार्याकार्या आतुन उमजवि विवेक होउन मनोहरा!२

भय मरणाचे, भय पापाचे, भय राज्याच्या अधिकाराचे
भय संहारक क्षात्रत्वाचे भय प्रलयाचे फारच जाचे
कर्तव्यास्तव कठोर कर केशवा दयाळा रमावरा!३

अभेद्य देहाची तटबंदी तिच्यात झालो आम्‍ही बंदी
मी माझेपण जडली व्याधी समाधान नच जीवा आधी
तळमळ खळबळ क्षुद्रपणाची कर घाणीचा या निचरा!४

समाज आहे विशाल सागर, थेंब जगे जर भरली घागर  
हव्यासा घालावा आवर, मुक्त असू दे जगती वावर
मने मोकळा तने ढाकळा असे करा रुक्मिणीवरा!५

शरीर नश्वर आत्मा शाश्वत तो ना जन्मत तो ना नासत
सोसा घावहि हासत खेळत, करा प्रहारा संधी साधत
दक्ष तोच लक्ष्यास टिपतसे हृदयि धरा हा बोध खरा!६

परिश्रमांनी मरे न कोणी सर्व राहते यत्‍नावाचुनी
संप सपवे तो तर ज्ञानी, खणतो खड्डा वृथाभिमानी
कल्याणाचे कळु दे थोडे संघटकांना धुरंधरा!७

दिव्यत्वाची जिथे प्रचीती तेथे कर सगळ्यांचे जुळती
प्रश्न सोडवी सहानुभूती, श्रीहरि नांदे सर्वांभूती
बरवी श्रद्धा, बरी सबूरी ती देण्याची कृपा करा!८

सहकाराची गाणी गाणे खेडोपाडी भेटी देणे 
स्वावलंबने जीवन सोने विश्वासाचे चलनी नाणे 
स्वाध्यायाच्या स्वीकाराने सुजला सुफला भूमि करा!९

साधे जीवन उच्च विचार तसे आचरण हाच प्रचार 
या सम ना दुसरा संस्कार मूर्ती घे सुंदर आकार 
सुदर्शनाचे दर्शन व्हावे भाग्यावर द्या अधिकारा!१० 

भेटीगाठी विरंगुळा साफसफाई विरंगुळा 
गीतागायन विरंगुळा सुखसंवादहि विरंगुळा 
स्वभाव येतो सुधारायला प्रयोगास या साह्य करा!११
 
रचयिता : श्रीराम बाळकृष्‍ण आठवले
१३.०७.१९९९