श्रीनारायण प्रसन्न होता..

श्रीनारायण प्रसन्न होता
गेली निर्धनता, आली आली प्रसन्नता!ध्रु.

कृपा हरीची ऐशी झाली 
लक्ष्मी पाणी भरू लागती
हसली भाविकता!१

अटळ ठेविता नेम नि निष्ठा 
प्रसन्न श्री हरि बघता बघता 
फुलली सात्त्विकता!२

पूजन करिता दुःख ओसरे 
काळे केले घन अंधारे 
उदया ये सविता!३

अनंत हस्ते देत रमावर
कृतज्ञता हो आज अनावर 
तनु पुलकित आता!४

व्रत सांगे तो श्रीनारायण 
सत्य सत्य तो श्रीनारायण 
दावि भक्तिवाटा!५

रचयिता : श्रीराम बाळकृष्ण आठवले
जुलै १९८२