महन्मंगले, देवि, दयावति, कसे तुला गाऊ?

॥ जय माताजी ॥ 

देवीचे स्तवन कसे करावयाचे ? देवीचे ध्यान कसे करावयाचे?
साधकाच्या अत्यल्प शक्तीची, मतीची त्याला जाणीव आहे म्हणूनच तो देवीला कुतूहलाने, विनम्रतेने प्रश्न करीत आहे -
++++++

महन्मंगले, देवि, दयावति, कसे तुला गाऊ? 
शक्तितत्त्व तू विविध स्वरूपी कसे तुला ध्याऊ? ध्रु.

सदाशिवाची तूच पार्वती 
विष्णूसन्निध तुझीच वसती 
रणचण्डी हो तुझीच मूर्ती 
आराध्या तू, योगिजनांची, कुठे तुला पाहू?१ 

तू ज्ञानाची उषा हासरी 
तू वायूची शीतल लहरी 
तू गरुडाची गगनि भरारी 
नसता कसले पुण्य गाठिशी जवळि  कसा येऊ?२

शक्तिसागरा दुरुनि पहावे 
विस्मितचित्ते विनम्र व्हावे 
हृदयमंदिरी तुज स्थापावे 
सामर्थ्याची धाव तोकडी परत कसा जाऊ?३

रचयिता : श्रीराम बाळकृष्ण आठवले
०३.१२.१९७३