चला हाती घेऊ झाडू करू सफाई सफाई - संत गाडगे महाराजांवरील कविता..

चला हाती घेऊ झाडू करू सफाई सफाई
नाम गोपाळाचे मुखी हीच पुण्याई पुण्याई!१
हाती 'गाडगे' धरले नाव पडले पडले
चिंध्या अंगावर ल्याले संत आगळे वेगळे!२
दारु पिऊन न कोणी दुःखसागर तरला
असो लहान वा मोठा एका पेल्यात बुडला!३
अरे लिहावे, वाचावे मस्त हिंडावे फिरावे
स्वये शहाणा होऊन जन शहाणे करावे!४
जगी दोनच या जाती कुणी नर कोणी नारी
देव पाषाणाचा नाही आहे दीनांचा कैवारी!५
यत्नाविण तो करंटा त्याच्या माथी हाणू सोटा
गाईगुरांना जो राखी त्याला म्हणू नये खोटा!६
नको कापाया कोंबडे नको कापाया बकरे
दया प्राण्यांवर करा लाड जिभेचे ते पुरे!७
जात परीट परीट स्वच्छ धुवावे कपडे
इस्त्री ऐसी चालवावी कुठे दोष न सापडे!८
रूढी बुडवी बुडवी बुध्दी कोडे हे सोडवी
मोठ्या हिम्मतीचे काम संत घडवी घडवी!९
गावा अभंग तुक्याचा करू विचार भावाचा
अर्थ ऐसा कळायचा झाली अनावर वाचा!१०
मनी उसळे विचार करू जगात संचार
ऐसा घडावा आचार त्याने घडावा प्रचार!११
घाम गाळावा गाळावा घास भाकरीचा घ्यावा
येई वाऱ्याची झुळुक देई हरीचा सांगावा!१२
देव धावणार नाही देव पावणार नाही
हातपाय हालवावे तरी तरशील पाही!१३
द्यावी लाकडे फोडून द्यावे शेत नांगरून
घर द्यावे शेकारून स्वच्छ झाडावे अंगण!१४
मी तो माणूस माणूस जात कशाला पुसता
देही जाणून देवता करा ममता ममता!१५
देव नाही देवळात आहे दीनदुबळ्यात
मनी उजळे पहाट धरा भक्तीचीच वाट!१६
पांग भक्तीने फिटला देव जनांत भेटला
असो आंधळा पांगळा देव प्रेमाचा भुकेला!१७
घ्यावे शिक्षण शिक्षण फेडा रयतेचे ऋण
पैसा वाढे देता दान  कार्य घडते महान!१८
भाऊराव पाटलांचा बाबा आंबेडकरांचा
स्नेह ऐसा घनदाट गहिवर ये प्रेमाचा!१९
व्हावे पायाचा दगड जनी असून नसावे
कैसे पुस्तक जगाचे उघडावे नि वाचावे!२०
यात्री यात्रेत खपला सरे मुक्काम येथला
मनी जागला जिव्हाळा रामे गीतात मांडला!२१

रचयिता : श्रीराम बाळकृष्ण आठवले
चला हाती घेऊ झाडू ( ऑडिओ )