ऐक केसरी तुझी कहाणी....

ऐक केसरी तुझी कहाणी
भास्कर असशी या नभांगणी!ध्रु.

शतकामागुन शतके निघती
गर्जनेस तव ना विश्रांती
आग वर्षते नेत्रांमधुनी!१

वृत्तपत्र छे तू आंदोलन
युवापिढीशी हस्तांदोलन
तुकयाची तू अभंगवाणी!२

लिहिशी जे ते ठामपणाने
झुंज झुंजशी निर्धाराने
मतपत्रांचा तूच अग्रणी!३

स्वराज्य आले सुराज्य व्हावे
जनसत्तेचे मुख उजळावे
रान उठव तू दाही दिशांनी!४

मराठबाणा उठून दिसतो
कुणी डिवचता उसळुन उठतो
कसूर ना कधि शत्रुमर्दनी!५

रचयिता : श्रीराम बाळकृष्ण आठवले
२ जानेवारी २००३