घरा घरातुन फॅमिली डॉक्टर सहजच पोचावा!

घरा घरातुन फॅमिली डॉक्टर
सहजच पोचावा!
जगावयाचे सुंदर जीवन
हुरूप वाढावा!ध्रु.

गप्पा गोष्टी हसतच घडता
दोष दिसुन यावे
सुधारीन माझे मजला मी
अनारोग्य जावे
वडीलधारा असाच माणूस सदैव जोडावा!१

विश्वासाचा अमोल ठेवा
बलवतीच श्रद्धा
रोगापासुन नक्की सुटका
मुक्तिलाभ बद्धा
आरोग्याचा बालबोध हा सुजना शिकवावा!२

काय करावे? कुणा पुसावे?
मैत्री डॉक्टरशी
ऐकायाचे केवळ त्याचे
कबुली आपणाशी
करी सिद्धता तना मनाची सोबती लाभावा!३

भाव बोलके हसरे डोळे
जुळलेले हात
पुनर्जन्म प्रतिदिवशी ऐसे
वाटतसे आत
आर्थिक लाभासह सुमनांचा मस्तकि शिडकावा!४

रचयिता : श्रीराम बाळकृष्ण आठवले
२८.१.२००४