जाता येता भगवंता रे गीता मी गाईन हर्षखेद मावळता सगळे आनंदे नाचेन..

जाता येता भगवंता रे गीता मी गाईन
हर्षखेद मावळता सगळे आनंदे नाचेन!ध्रु.

कृष्ण कृष्ण जय धर्म तिथे जय
मी आत्मा हा झाला निश्चय
अनंत राघव, अनंत यात्रा, पुढती पुढती जाईन!१

कर्म न टळते सुसंधि असते
सराव घडता सुंदर बनते
स्वकर्मकुसुमे तव चरणांवर आनंदे वाहीन!२

जगात येणे, जगा सोडणे
स्वाभाविक जर कळणे वळणे
देहाहुन या मने निराळा तुझ्या कृपेने राहेन!३

संस्कारच गीतेचे वाचन
संस्कारच गीतेचे गायन
मोहा झटकुन अरे मोहना निर्मोही होईन!४

कर्तव्यातच मोद संचला
पालन करता प्रज्ञा अचला
आत्मज्ञानाच्या ढालीवर प्रहार सारे झेलीन!५

परमहिताचे इथे सांगशी
निर्णय पार्थावरी सोडशी
स्वातंत्र्याचा खरा अर्थ मी परोपरीने जाणेन!६

गीता गंगा, यमुना गीता
अवगाहन संगमात घडता
अलिप्ततेचे भस्म चर्चुनी व्यवहारीही वागेन!७

रचयिता : श्रीराम बाळकृष्ण आठवले