घे मना झेप तू अज्ञाती! घे तना झेप तू अज्ञाती..

घे मना झेप तू अज्ञाती
घे तना झेप तू अज्ञाती!ध्रु.

कालोदरि शककाल संपले
कालोदरि कल्लोळ उसळले
देहदंड ज्या प्रदीर्घ होणे
तयेच करणे चमत्कृती!१

त्रिकालदर्शी योगी बन तू
तू अनंत हा अनुभव घे तू
एकवटूनी शक्ती सारी
साधुनि घे तू झणि मुक्ती!२

कालपुरुष कानात सांगतो
मानव जागृत सावध होतो
मुहूर्त कसला शोधत बसशी
नको बाळगू काहि क्षिती!३

अज्ञाताचा प्रवास सारा
सागर करितो तुला पुकारा
कशास बघसी मागे पुढती
करू नको व्यर्थच खंती!४

दूर टेकले गगन समुद्रा
जपत रहा मुक्तीच्या मंत्रा
अंधुक आशा याच पळाची
पहाट पुढती फटफटती!५

स्वातंत्र्याचा भार शिरावर
शिवरायांचा मिळे तुला वर
सागरात घे झोकुनि ऐसे
येईल करि मुक्ती मोती!६

रचयिता : श्रीराम बाळकृष्ण आठवले