पुनःश्च हरि ॐ, पुनःश्च हरि ॐ
जनसेवेचे व्रत पत्करले
सत्पक्षाचे कंकण धरले
वाण सतीचे शिरी घेतले
मनात मंत्रा घुमवित बसतो - हरि ॐ
पुनःश्च हरि ॐ
संकटि होते सत्त्व परीक्षा
दिव्य देशभक्तीची दीक्षा
आत्मबलाची याचित भिक्षा
कण कण झिजु दे कायाचंदन - हरि ॐ
पुनःश्च हरि ॐ
सत्कार्याचा ईश्वर प्रेरक
भक्तालागी तो संजीवक
आशेचा करि उज्ज्वल दीपक
घनतिमिरी पथ उजळ देखता - आत्मा अवचित गाऊनि जातो
हरि ॐ हरि ॐ
आज वाटते जीवेभावे
कार्य अखंडित सुरु असावे
स्फूर्तीचे इंधन लाभावे
प्रसन्नतेच्या जलबिंदूनी समाधान अक्षय मिळवावे
हरि ॐ हरि ॐ
बळे पोत केला जरि खाले
ज्वाला वरती तरी उफाळे
विरोधेच चैतन्य सळसळे
स्वधर्म अनुसरिता मी प्रतिक्षण करेन प्रभुचे नामोच्चारण
हरि ॐ हरि ॐ
रचयिता : श्रीराम बाळकृष्ण आठवले
०३.०२.१९६८
No comments:
Post a Comment