आपली श्रीगीतामाउली

कसे जगावे याची आहे सुंदर नियमावली 
आपली श्रीगीतामाउली ! ध्रु.

सुधारणा हो आपल्यापासुन
आपआपणा नियमित निरखुन
उद्धारा धावली!१

देहांतर मरणाला म्हणते 
आत्म्याचे अमरत्व सांगते 
सांत्वनास सजली!२

केविलवाणे कधी न व्हावे 
देहदुःख ते सुख समजावे 
वक्तृत्वे विनटली!३

मनावरी ठेवता नियंत्रण 
रोगांचे झडकरी विसर्जन
सूत्रबद्ध दिसली!४

निर्धाराने सगळे जमते 
नीती मुरता वृत्ति पालटे
विचार दीपावली!५
 
रचयिता : श्रीराम बाळकृष्ण आठवले
(प्रसिद्धी - गीता दर्शन एप्रिल २००५)

आधार : दुःखमुक्त जीवनासाठी गीता
रा.रा. जांभेकर