"फेडायाचे ऋण ते मजला"-

जे देवाने दिले तुला ते
कृतज्ञतेने पहा, पहा!
"फेडायाचे ऋण ते मजला"-
असे बजावत रहा रहा!ध्रु.

देह दिला तो राखी निर्मळ
कृष्णच आत्मा तव तन गोकुळ
श्वास नव्हे रे 'वेणुनाद' तो
सोsहं सोsहं सुरू अहा!

मन दिधले ते वश घे करुनी
कलाकलाने आत वळवुनी
हरिभजनाची चाखव गोडी
कमलपत्रसम जगी रहा!

भलेबुरे ते सहजच कळते
आतुन कोणी तुला शिकवते
मना आवरुन तनू सावरून
कर्तव्याला करत रहा!

गुण शोधावे सांगत जावे
न्यून दिसे ते पूर्ण करावे
सत्कार्याला दे उत्तेजन
गुणानुरागी सदा रहा!

कर्तव्याला करीत असता
निर्वाहाची कशास चिंता
शुभ चिंतावे, शुभ बोलावे
अनुसंधानी नित्य रहा!

रचयिता : श्रीराम बाळकृष्ण आठवले
२१.९.१९८९