सिद्ध होई मना, रामगुणगायना..

सिद्ध होई मना, रामगुणगायना!ध्रु.

रामनामा स्मरी
तू तुला उद्धरी
ब्रह्मरस मेळवी तू तुझ्या भोजना!१

योगिजन ध्याति जे
चित्ति तू आण ते
कल्पतरु नाम ते पूर्ण करि कामना!२

राम हृदयी असे
राम देही वसे
हे मना जाण तू उघडि तव लोचना!३

राम राही जिथे
काम नसतो तिथे
होय निःसंग तू चालवी साधना!४

रामदासा मना
रामभक्ता मना
राम शरणागता दूर लोटीत ना!५

१३.७.७३
आषाढ शुद्ध त्रयोदशी १८९५
शंकरा - जोड झणि कार्मुका
झंपा