गीतारहस्य जाणू -

गीतारहस्य जाणू कर्तव्य पार पाडू!ध्रु.

श्रीकृष्णजीवनाचे तात्पर्य हेच आहे
निष्काम कर्म हाच उद्योग वाटताहे
कार्पण्यदोष पूर्ण सगळे मिळून गाडू!१

विक्राळ विघ्न आले भय लेश ना आम्हाला
कोणी स्तवोत निंदो ना स्पर्श या मनाला
एकेक सद्गुणाला आम्ही सदैव जोडू!२

कारागृही जरी वा सत्तेवरी असावे
अंतःस्थ श्रीहरीला आम्ही सदा स्मरावे
साही रिपूस सारे देशांतरास धाडू!३

आहे कसा खरा मी ध्यानात पारखावे
व्हावे जगी कसा मी आधी सदा झटावे
मालिन्य जे मनाचे निपटून सर्व काढू!४

ये वज्रता तनाला खंबीरता मनाला
साफल्य सत्कृतीला ये तीक्ष्णता मतीला
स्वानंद हाच मोक्ष खाऊ आनंद लाडू!५

जी मूळ बंदिशाला ती मुक्तिची प्रशाला
अध्यापकेच येथे अभ्यास खोल केला
कारागृहास तीर्थ वदतात संतसाधु!६

रचयिता : श्रीराम बाळकृष्ण आठवले
१७.०९.२००३
गीतारहस्य जाणू- (ऑडिओ)