मराठी मायबोली! साध्या सरळ स्वभावाची - निर्मळ मनाची! ज्ञानदेव - तिचं लाडकं लेकरू. बाळाला कोण अभिमान आपल्या माऊलीचा! बाळाचं वय लहान, पण कार्य महान! त्यानं 'म्हराटिचिये नगरी' ब्रह्मविद्येचा सुकाळु केला. अलंकारांचा साज चढवला. आईला श्रीमंत केलं!
माता या गुणी बालकाविषयी कृतज्ञ आहे. तिचे डोळे पाण्याने भरले आहेत. कंठ दाटला आहे. जीवघेणी आर्तता उरात कोंडली आहे - तिला लागला आहे ध्यास - मांगल्याचा, भावनांच्या कोवळीकेचा, कैवल्याचा, सोलीव सुखाचा! म्हणून तर ती साद घालते आहे आपल्या लेकरास. बांधते आहे त्याची पूजा. गाते आहे भूपाळी. जिच्यात आहे केवळ कृतज्ञता, केवळ सद्भाव, केवळ गुणांचे नम्र पूजन
************
माता या गुणी बालकाविषयी कृतज्ञ आहे. तिचे डोळे पाण्याने भरले आहेत. कंठ दाटला आहे. जीवघेणी आर्तता उरात कोंडली आहे - तिला लागला आहे ध्यास - मांगल्याचा, भावनांच्या कोवळीकेचा, कैवल्याचा, सोलीव सुखाचा! म्हणून तर ती साद घालते आहे आपल्या लेकरास. बांधते आहे त्याची पूजा. गाते आहे भूपाळी. जिच्यात आहे केवळ कृतज्ञता, केवळ सद्भाव, केवळ गुणांचे नम्र पूजन
************
माय मराठी साद घालते ऊठ ज्ञानराजा!
ऊठ! ऊठ राजा! ध्रु.
तू सुखलहरी ज्ञानाबाई
भक्ती जडली तुझिया पायी
मायबोलि मी आनंदाने करित बालपूजा!१
तूच अर्पिली अमित भूषणे
तूच कोरले शिल्प देखणे
ज्ञानदेवि मळवट भालीचा भरलासी राजा!२
अरूप बोली तू दाखविले
नादवीत शब्दांचे वाळे
माझ्या नगरी पुन्हा एकदा दुडुदुडु ये राजा!३
ज्ञानज्योत लावली तेवली
लक्षजनांचे अंतर उजळी
दीपकळी ही अक्षय तेवो हाच भाव माझा!४
जगावेगळे घडले काही
तू मातांची होसी आई
कृतार्थ माता हट्ट धरतसे, पुरव पुरव राजा!५
रचयिता : श्रीराम बाळकृष्ण आठवले
१९७१
देसकार - केरवा
