मन करा रे निर्मळ, तेथे नांदेल गोपाळ!

मन करा रे निर्मळ, तेथे नांदेल गोपाळ!ध्रु.

मन चंचल, चंचल
त्यासी करणे निश्चल
बहिर्मुख ऐसे मन कधी अंतरी वळेल?१

"देह नव्हे मी" हे घोका
देहासक्ती मोठा धोका
सोऽहं बोधाचा अभ्यास गुरुकृपेने साधेल!२

होता मानस प्रशांत 
आत हासे भगवंत
"परमात्मा जो शाश्वत तोच मी" ऐसे कळेल!३

मन ऐसे वश होता
वासनेची नुरे वार्ता
मूळरूप परमात्मा स्वये साधक होईल!४

रचयिता : श्रीराम बाळकृष्ण आठवले
१२.०२.१९७४

यमन कल्याण केरवा

(तया स्वांत:करणजिता
सकळ कामोपशांता
परमात्मापरौता
दुरी नाही

या ज्ञानेश्वरीतील ओवीवर आणि ज्ञानेश्वरी ज्ञानकिरणे या स्वामी माधवनाथांच्या पुस्तकातील प्रवचन क्रमांक ५१ वर आधारित काव्य)